મૌન એટલે શબ્દોએ કરેલો નકોડો ઉપવાસ

મૌન એક છે પણ એની કેટલી બધી ભાષા છે ખબર છે.?

જ્યારે કોઈ રિસાય જાય ત્યારે કોઈ મનાવે એવી રાહમાં  રખાતું મૌન

જ્યારે કોઈ બહુ દૂર જતું રહે ત્યારે ભીતરની ભોંમાં ચીસો  પાડતું મૌન

પ્રિયતમ એ કરેલા પહેલાં સ્પર્શને માણતું નાચતું ગાતું મૌન

પીડા પછી જીવમાંથી આકાર લીધેલ જીવને જોઈ પેલી તાજેતાજી બનેલી માતાનું મૌન

પોતાની દીકરીને પુખ્ત થતી જોઈ ભૂતકાળની છેલબટાઉ પોતાની જાત પર સંતાપ કરતું એ પુરુષનું મૌન

જીભ ઉપડે નહિ અને વાત આગળ ચાલે નહિ ત્યારે આંખોથી કેટલું બધું બોલતું મૌન

એક વ્યક્તિની સાથે અન્યાય થાય છે અને કંઇ ન કરી શકવાની લાચારી માં કણસી રહેલું મૌન

બાપના બાપ ન થવાય આમ વિચારીને હરેક વાતે હામી ભરતા સંતાનનું મૌન

ઘરના બદલાતા વાતાવરણ અને બદલાતા વિચારોની વચ્ચે પેલા વૃદ્ધનું માળા ફેરવતું મૌન

બાપના ઘરેથી શું લાવી આના જવાબમાં પોતાના સંસ્કારને મોઢામાં અકબંધ રાખતી એ નવોઢાનું મૌન

વર્ષોથી રાહ જોતી વ્યક્તિની રૂબરૂ થતાં બધું સુનનનનનનનન કરી મૂકતું મૌન

દિવાળીએ ખર્ચા ઉગી નીકળે ત્યારે ગજવામાં કાતર ફરી જતાં ફૂટતા ફટાકડાનું મૌન

શરીરને ચૂથાતું જોઈ ચોકલેટની લાલચે ચૂપ રહેતી પેલી નાની બાળા મૌન

વિદેશ જતાં છોકરાને જતો જોઈ સંતાડતા ડૂસકાં માં રહેલું મૌન

અનાથ બાળકને જોઇને થતી દયાની લાગણીનું મૌન

પિયર આવેલી છોકરીના જીવનમાં અનુકૂળતા ઓરવા મીઠી મીઠી કેરી ખવરાવતું મૌન

રાખડી અને ફૂલની પાંખડી સાથે દીવા સાથે બલાઓ ઉતારતી એ ભગીનીનું મૌન

માંગણીની લાગણી ઓછી કરતું પેલું સમજુ બાળકનું ખિલખિલાટ કરતું મૌન

પોતાની શકિતઓને મનમાં રાખીને દિવ્યાંગ હોવાનો વસવસો કરતું મૌન

આંખોમાં કાજળ સાથે પોતાની જાતને રોજ નવો મુખોટો પહેરાવતી પેલી વૈશ્યાની પથારી નીચે કચવાતુ મૌન

સરહદ પર લડતાં પેલા સૈનિક અને એના પરિવારે કરેલા કેટકેટલાય સપનાઓનું મૌન

વૃદ્ધાશ્રમના ખાલી બગીચા સાથે પોતાના જીવનને સરખવાતું પેલું વૃદ્ધાનું મૌન

પોતાના મસમોટાં દરિયાને છોડવાના દુઃખ સાથે એકવેરિયમમાં તરતી પેલી માછલીનું મૌન

પોતાની સહેલી(ચકલી)ની આખી જાતિને શોધવા આમતેમ ઊડતી પેલી કાબરનું મૌન

ભીખ માંગતા પેલા ભૂખ્યા બાળકમાંથી ડોકિયું કરતું મૌન

બસના ધક્કા વચ્ચે પોતાનું અસ્તિત્વ શોધતા પેલા યુવકનું મૌન

આંખોના કુંડાળા અને પોતાની કેટલીક અભિલાષા સંતાડતી પેલી ગૃહિણીનું મૌન

બીમારીના ખાટલે પોતાના દિવસોને આંગળીના વેઠે ગણતું એ જીવતરનું મૌન

મૌન એક શબ્દ કે એક લાગણી
પાણી પડયું પડ્યું ગંધ કરી જાય
એમ શબ્દો ઘણી વાર ઘર કરી જાય

પણ મૌન એ એક ઉજાસ છે એક ઉપાય છે
ન કહેવું અને ન કહેવું જોઈએ
આ બંને વચ્ચેનું અંતર છે મૌન

અને ખરેખર તો જીવનની લડત આની વચ્ચે જ છે..
શબ્દો એ તીર છે તો મૌન એ ઉધમ છે

મૌન પોતે લાગણી છે અને એની સામે દુનિયા પાંગળી છે.

હિરલ જગડ
“હીર”

मैं उस की आस में यूँ बैठा हूँ जैसे

किसी ला-इलाज को इंतेज़ार हो मौत का

क्या चल रहा है ??

ofcourse
कोरोना और लोकड़ाउन चल रहा है।

આજે વાત જાણે આપણા મૃત્યુના સમયની કરવાની છે..એટલે કે એક વિચાર કરવાનો છે કે જ્યારે મરણ પથારીએ પડ્યા હશું તો આપણી પથારી પર ખાલી આપણે જ હોઈશું કે પછી અધૂરી ઇચ્છાઓની ચાદર ઓઢી હશે આપણે ?
કે પછી
“એ તો લોકોને ખરાબ ન લાગે એટલે મેં આમ કર્યું” આવા કેટલાય વસવસાના રૂ થી ભરેલું ઓશીકું ટેકવ્યું હશે આપણે માથે..?
આટલી મજૂરી વેઠીને માનને બદલે ફક્ત મેણા મળ્યા અને જસને માથે જોડાથી સજ એવી પથારીમાં છેલ્લા શ્વાસો ગણતા હશો..?
હોસ્પિટલના નિર્જીવ પલંગની આસપાસ સહજીવન કાપનાર લોકો જો નહિ દેખાય તો કાંપતા હશું આપણે ?

અહીં ઉદ્દેશ્ય શું છે આ બધી વાત કરવાનો ખબર છે..? છેલ્લા અઠવાડિયાના એક પુસ્તકની ઝાંખી અને જીવનનો સ્પર્શ જે મને મળ્યો તે તમને સોંપવાનો છે.

પુસ્તકનું નામ છે THE TOP FIVE REGRETS OF DYING આ લખનાર BRONNIE WARE
છે કે જેઓ વ્યવસાય એ ખૂબ કાબિલ પરિચારિકા (NURSE) છે.

એમના જીવન દરમ્યાન ખૂબ યોગ્ય રીતે પોતાની ફરજ બજાવી..જે પૈકી એક વાર એમની ડયુટી એક એવા વોર્ડમાં (વિભાગમાં) મૂકવામાં આવી કે જ્યાં માત્ર એવા જ દર્દીઓ આવતા જેમનું જીવન પૂર્ણતાની આરે હોય..
લગભગ તે બધા દર્દીઓને પણ ખ્યાલ હતો કે તેઓ હવે વધુ લાંબુ જીવવાના નથી.

થોડા દિવસ પછી બોર્ની એક અભ્યાસ હાથ ધરે છે..તે દર્દીની સારવાર અને COUNSELLING દરમ્યાન કેટલાક પ્રશ્નો પૂછવાના શરૂ કર્યા જેમાં દર્દીઓના જીવનમાં રેહેલો કોઈ અફસોસ કે કોઈ ઈચ્છા કે કોઈ વસવસો પૂછવામાં આવ્યો.

બધા દર્દીઓએ પોતાના અનુભવ જગતમાંથી જીવનની ઢળતી સાંજે કેટલાક રંગીન પાસાંઓ પાડયા..આ બધામાં સમાન રહેલા પાંચ રિગ્રેટ્સ જે હતા તેની વાત તેમણે પોતાના પુસ્તકમાં કરી છે.

1. I WISH I’D HAD THE COURAGE TO LIVE A TRUE TO MYSELF,NOT THE OTHERS EXPECTED OF ME.

। सबसे बड़ा रोग क्या कहेंगे लोग ।

મોટા ભાગનું જીવન આપણું કોઈકના અભિપ્રાયોની ઈંટો પર ચણાતું હોય છે..આપણે પહેલા એટલે એટલે વિરોધ નથી કરતાં કેમકે આપણે બીજાની ખુશીની વિચારીએ છીએ અને પછી હિંમત જ નથી કરી શકતા આપણા આત્મ સ્વમાનનો પાયો નાખવાની..આપણી ઇચ્છા,મહત્વાકાંક્ષા,આત્મ વિશ્વાસ પર ” બીજા શું વિચારશે ” નામનું રોડ રોલર ફરી ગયું હોય છે.

એટલે મરણ પથારી પર એક છેલ્લો અફસોસ એ હોય છે કદાચ મેં મારું જીવન મારી રીતે જીવ્યું હોત..નહિ કે બીજા એ જેમ ઇચ્છ્યું તેમ ચીતર્યું હોત.

2. I WISH I HADN’T WORKED SO HARD

બંધ મુઠ્ઠી લઈને આવ્યા અને ખાલી હથેળી લઈને જવાના છીએ આ વાત આપણે સૌ જાણીએ છીએ તેમ છતાં આપણે અથાક મહેનત કરીએ છીએ આપણા(પોતાના) માટે નહિ આપણા (સ્વજનો) માટે આપીએ છીએ. કામના સમયમાં આપણે વ્યવહાર, હાસ્ય,આક્રંદ ,ભૂખ,તરસ,સુખ આ બધું ભૂલી જઈએ છીએ લાગણી ભૂલી જઈએ માત્ર બીજાની માંગણી સંતોષી આપણી જાતને જવાબદાર નીમી દઈએ અને અંતે એ જ અફસોસ રહી જાય છે કાશ ભાગ્યો ન હોત પણ જીવ્યો હોત તો મરવું સરળ થઈ જાત.

3. I WISH I’D COURAGE TO EXPRESS MY FEELINGS.

લાગણીને આપણે દરિયા જેવી બનાવી મૂકીએ છીએ..કિનારે આવે અને પાછી વળી જાય..કંઇ કહેવાનું નહિ અંદર અંદર ઉછળ કુદ મચાવીને શમી જવાનું..આ દુઃખભર્યું છે..તમારા મનની અંદર લાગણીનું ઝરણું ફુટે તો એને દરિયો બની વહેવા દો..મૌનને mute કરી શબ્દોને કહેવા દો.

4.I WISH I STAYED IN TOUCH WITH MY FRIENS

આપણે આજના ડિજિટલ યુગમાં સ્પર્શ ભૂલી ગયા છીએ એવી જ રીતે આપણે આપણા મિત્રો કે શુભચિંતકો ને ભૂલી ગયા છીએ..આને મળી લીધું હોત તો સારું હોત..આની સાથે થોડું વધુ રહેવા મળ્યું હોત તો સારું હોત આવા કેટલાય અફસોસ આપણા ધબકારાની વચ્ચે ચાલતાં હોય છે.

5.I WISH I HAD MYSELF BE HAPPIER.

એકલા રડો તો કોઈ જોતું સુદ્ધા નથી પણ એકલા હસો તો કદાચ એમ્બ્યુલન્સ આવી શકે.દુનિયામાં બહુ ઓછા લોકો ઈચ્છે છે કે આપણે ખુશ રહીએ અને આપણે એ બધાની ઈચ્છાને પૂરી કરતા ફરીએ હસવાનું મુલતવી રાખીએ એવી રીતે એની તારીખો પર તારીખો પડે કે જેમ દામિની કે નિર્ભયા કેસના ચુકાદાની પડતી હોય ન એને ન્યાય મળે અને ન તો આપણને આપણું સ્મિત.

આ તારણ અને પાંચ કારણ કેટલા સાચા છે..આપણે જીવવાનું ભૂલીને દોડવાનું શરુ કર્યું છે એ પણ એવી રેસમાં કે જ્યાં અંતમાં એક પથારી રાહ જોવે છે ઘણી બધી મરેલી ઇચ્છાઓની સાથે..આ પુસ્તક જરૂરથી વાંચો આ પાંચ કારણો જાણી લ્યો અને મરણ પથારી એ વસવસો ન થાય તે માટેની તૈયારી શરૂ કરી દ્યો.

કોરોના એ લુડો રમતની ઓટોમેટિક ચાલતી કુકરી જેવી બીમારી છે એટલે જ ઘરમાં રહેશો તો જ સલામત રહેશો.🤗

મજા કરો..સ્વસ્થ અને સલામત રહો.
માનસિક તાણ, સહાનુભૂતિ કે મદદ ઝંખો છો તો આ હેલ્પલાઇન પર મીસ્કોલ કરો..-9555-825-001

-HIRAL M JAGAD
“HEER”

હરરોજ ઘરમાં એક વાર તો ઝઘડો થાય જ છે
કારણ શું હોય ખબર છે ?
પપ્પા અને ભાઈને બહાર જવું હોય અને મોટી બહેન ખૂબ ગુસ્સામાં તેમની સાથે દલીલો કરતી હોય કે નથી જવાનું..ઘરના આગળ અને પાછળના દરવાજાથી આગળ વધવાનું નથી..વાત તો સાચી છે અને યોગ્ય જ છે કે આપણે બહાર ન જઈએ..

પણ આ વાત પરથી એમ વિચાર આવે કે પેલા ડોકટર,નર્સ,પોલીસ,દૂધવાળા,શાકવાળા,સફાઈના સહાયકો,ગેસ સિલિન્ડર પહોચાડનાર,ઘર સુધી છાપું આપનાર,અનાજ અને જરૂરિયાતની વસ્તુ વહેચનાર, સરકારી કર્મચારીઓ આ બધાંના ઘરમાં પણ આવા પ્રકારનો ઝઘડો થતો હશે ??

આ બધા પોતાની ફરજ બજાવતા હશે ત્યાં એમની સાથે એક ડર પણ ફરજ બજાવતો હશે કે કદાચ તેને આ રોગ થઈ શકે અને કદાચ આ માધ્યમથી એનું પરિવાર પણ જોખમાય શકે..! આ ડરને આપણે વધારે ડરામણો બનાવીએ છીએ કેટલીક ન કરવા જેવી બાબતોને હજુ આપણે મૂર્ખ બનીને કરી રહ્યા છીએ..આ પ્રયત્નો પર આપણે આપણા ખોટા વર્તનથી પાણી ફેરવી રહ્યા છીએ..!

થોડી કાળજી રાખવાની છે કે બસ તમારે એ જગ્યા પર રહેવાનું છે કે જેનું સરનામું તમે બધે જ કાયમી ઠેકાણા તરીકે બતાવ્યું છે..તો બસ આટલું કરોને સાહેબ આ કાયમી ઠેકાણા પર થોડો સમય અડો જમાવી રાખો તમને તમારા ઘરને અને ઘરના સભ્યોને આ ઠેકાણાંનો અહેસાસ કરાવો કે સારું છે કે આ રહેઠાણ છે.

ઈટલીના નેવું વર્ષના વૃદ્ધ કોરોના વાયરસથી મુક્ત થયા એ સ્વસ્થ થયા ત્યારે મેડિકલ સ્ટાફે તેમની પાસે માત્ર વેન્ટિલેટરનું જ બીલ માંગ્યું ત્યારે વૃદ્ધના ચહેરા પર વિચારોની રેખાઓ છવાય ગઈ આ જોઈ,

ડોકટરે કહ્યું કે “જો આપની પાસે પાંચ હજાર પાઉન્ડ ન હોઈ તો ચિંતા ન કરશો તમે આરામથી ઘરે જઈ શકો છો”

ત્યારે વૃદ્ધ વ્યક્તિ જવાબ આપતા કહે છે કે “ના ના,હું તો એ વિચારું છું કે જો મારે થોડા દિવસના વેન્ટિલેટરના પાંચ હજાર પાઉન્ડ આપવા ના હોય તો ઉપરવાળાનો હિસાબ કેટલો મોટો હશે ? કે નેવું વર્ષ સુધી મને વેન્ટિલેટર બક્ષ્યું છે..”

મળ્યું છે તેમાં ખુશ રહો જેના થકી મળે છે તેને માન આપો.. જેના થકી તમે છો તેને ખુશ રાખો.

મુશ્કેલીમાં વધારો નહિ કરો તો દાલગોના કોફીની જેમ કોરોના ઉપર ઉપર રહેશે અને પછી સાવ જતો રહેશે…નવી નવી વાનગીઓમાં એક વાનગી સમજણની બનાવીએ તેમાં થોડી ધીરજ અને થોડી વિચારણા નાખીએ..આંખો ખુલ્લી અને મોં અને વોટસઅપમાંથી નીકળતી અફવાઓની વરાળોને ભગાવી એ..ઘરની અંદર રહીને જાત સાથે તેને માણીએ..!

દેખતી રીતે મુશ્કેલી કંઇ નથી આપણે માત્ર સમયનો યોગ્ય ઉપયોગ અને આયોજન કરતાં ક્યારેય શીખ્યા જ નથી લોકડાઉન નહોતું ત્યારે પણ અને લોકડાઉનમાં છીએ ત્યારે પણ..ઘડિયાળ આપણા હાથમાં હોય છે પણ આપણો સમય આપણા હાથમાં હોતો જ નથી.. સાચું કહેજો આ વાત સાચી છે ને ?

_ હિરલ મહેશભાઈ જગડ ‘ હીર ‘ ❤️

આજે અને છેલ્લા અઠવાડિયામાં સાંભળવામાં આવ્યું કે હવે સલાહકાર અને મનોવૈજ્ઞાનિક મારફતે સલાહ પરામર્શ શરૂ કરવામાં આવ્યો છે ( અલબત્ત એનો હું પણ એક ભાગ છું ) લોકોની શારીરિક જરૂરિયાતને પૂરી કરવા આર્થિક મદદ અને રાશન ઘરે ઘરે પહોંચતું થઈ રહ્યું છે ત્યારે આવેગિક મદદની પણ જરૂર છે આ વિચાર ખૂબ યોગ્ય જ છે..🌼 પણ અહીં ઘણા બધાને એમ થાય કે આપણે થોડી ગાંડા છીએ આપણને થોડી કંઇ થયું છે..તે આપણે એ કાઉન્સેલિંગ બાઉન્સેલિંગ કરાવીએ..તો એક એ બધા મિત્રો માટે આજનો આ બ્લોગ.

પહેલી વાત તો આપણે શા માટે આપણી કાળજી રાખીએ છીએ ? કેમ કે આપણે જીવવું છે લાંબુ અને મધમીઠું જીવવું છે..! જાપાનીઝ લોકોનું નિરીક્ષણ અને સંશોધન બતાવે છે કે ત્યાંના લોકોનું આયુષ્ય સૌ વર્ષ કરતાં વધુ છે..અને ખાસ કરીને ઓકિનાવા આઈલેન્ડ પર વસતા લોકોનું..આવું શા માટે હશે ? જેનો ઉતર “Ikigai: The Japanese Secret to a Long and Happy Life” માં છે જે Hector Garcia and Francesc Miralles દ્વારા લખાયેલ ખૂબ પ્રસિદ્ધ પુસ્તક છે.

Ikigai શું છે અને તેનું દીર્ઘ જીવન અને સુખમયતા સાથે શું નિસ્બત આ વાતને સમજવા તેની ત્રણ બાબતને સમજીએ.

1.Move More to Live More : ઓકિનાવા પર વસતા તમામ લોકોમાં આ વસ્તુ જોવા મળતી કે તેઓ સતત કોઈ શારીરિક પ્રવૃત્તિમાં જોતરાયેલા રહેતા જેના કારણે તેના શરીરમાં ઊર્જાનો સંચાર થતો રહેતો પોતે કશુંક કામ કર્યાનો અહેસાસ તેને વધુ ઉમંગ પ્રદાન કરતો..અને તે સતત પોતાની પ્રવૃત્તિ કરતાં રહેતા જેમાં ફૂલછોડ ઉછેર અને જતન..ખેતી..રમતો..વોલકિંગ આ બધું કરતાં જોવા મળે છે..પેલું કેહવાય છે ને

” Sitting is the new smoking ”

બેઠાડું જીવન એ પણ એક પ્રકારનું જીવલેણ વ્યસન છે આના કારણે નાના મોટા માનસિક અને શારીરિક રોગો પણ ઉદભવ્યા છે જેમ કે ડિપ્રેશન,ચિંતા,મેદસ્વીતા,આત્મવિશ્વાસનો અભાવ વગેરે. જ્યારે આપણે કોઈ ચહલ પહલ કરીએ છીએ ત્યારે આપણા શરીરના ઘણા બધા ભાગોને રાહત મળે છે એને મોમેન્ટથી આનંદ અને ઉત્સાહ મળે છે પરંતુ આપણે તે ભૂલી જતાં હોઈએ છીએ અને મોટાભાગનો સમય બેઠાં બેઠાં પસાર કરી દઈએ છીએ અને પછી જીવનના પ્રશ્નો ઉભા થઈ જાય છે..એટલે જો જીવન વધુ ચલાવું છે તો ચાલવા મડવું પડશે ( હાલ ઘરમાં જ ચાલજો હો કે..! )

2.સામજિક વર્તુળ : આપણે લોકોથી છીએ અને લોકો આપણાથી આ વાત અત્યારે આપણે બધા જ ક્યાંક ને ક્યાંક અનુભવીએ છીએ..ઘરની અંદર અને મનની અંદર ખાલીપો ખખડે છે તે છે લોકો અને તેની સાથે જોડાયેલા આપણા સંબંધોનો.

આ પુસ્તકમાં નોધ્યું છે જે ઓકિનાવામાં લોકો આંતર પારસ્પરિક સંબંધ બાંધવામાં આગળ છે ત્યાં એવા કેટલાંય લોકો છે કે જેઓ બાળપણના મિત્રો છે અને આજે ૧૦૦ વર્ષના છે અને સાથે વૃદ્ધ થઈ રહ્યા છે કેમ કે તેઓ વધુ અને વધુ લોકો સાથે સમય વિતાવે છે અને પોતાના જીવનને વધુ ખુશ અને ઉમંગ બનાવે છે..2004 માં આવેલ FRIENDS સિરીઝ ખૂબ ચાલી એનું કારણ પણ આજ હતું કે તેમાં સામાજિક વર્તુળ દર્શાવવામાં આવ્યું હતું.અને લગભગ ત્યારે જ FACEBOOK પણ જુક્રતબર્ગ સાહેબ લાવ્યા અને ત્યાર બાદ આપણા સંબંધો એકચૂલમાંથી વર્ચ્યુઅલ તરફ વળ્યાને અત્યાર આપણે એ જ એરામાં જીવીએ છીએ.

ત્રીજી અને સૌથી અગત્યની વાત જે આ પુસ્તકનું મૂળ છે IKIGAI : જેનો સરળ અર્થ છે લાંબુ અને ખુશ જીવન જીવવાની ચાવી એવો થાય છે..તે મુખ્ય ચાર બાબતોથી ગુંધાયેલું છે..1.What you love ? 2.What the World Need ? 3. What You can be Paid ફોર ? 4. What You are Got at ?

આ ચાર બાબતો છે જેના કારણે તમે જીવો છો અથવા તો એ તમને જીવાડે છે…થોડા દિવસ પહેલા એક ફિલ્મ જોઈ The Martin (2015) કે જેમાં એક નાસાનો વૈજ્ઞાનિક દોઢ વર્ષ સુધી મંગળ પર રહે છે એ કોઈ કારણસર ત્યાં ફસાઈ જાય છે અને પછી એ જે રીતે નવું જીવન શોધે છે તે જ કદાચ એની ikigai છે..આપણા બધા પાસે આ છે માત્ર એને શોધવા વહેલાં મોડા પડીએ છીએ..આ વાત ઘણી બધી જગ્યાએ બતાવી છે જેમાં થ્રી ઇડિયટ્ના ફરહાન નું ઉદાહરણ લ્યો કે બદ્રી કી દુલ્હાનીયાની વૈદેહી નું કે પછી મહેન્દ્ર સિંગ ધોનીને જોવો કે અમિતાભ બચ્ચનને કે પછી આયુષ્માન ખુરાનાને..આ બધા લોકોને પોતાની Ikigai મળી ગઈ છે ઘણી થાપ ખાયા પછી..જે વસ્તુ તમારો એલાર્મ છે તે જ તમારી ikigai છે જે વસ્તુ તમને જગાડી મૂકે તે જ તમે કંઇક અપવાશે.. હા પૈસા અને ફેમ મળશે પણ આરંભ આનંદથી થશે એક કામ એવું શોધવાનું છે કે જે તમને આનંદ આપે સાથોસાથ તે લાભકારક કેટલું અને તમારી પાસે દુનિયા શું ઈચ્છે અને અંતમાં તમે તેનાથી શું પામો છો..તમે ફેમ માંથી ફ્રેમ્માં જાઉં તે પહેલાં આ શોધી લેવાનું છે..!

અત્યારે આ વાત મૂકવાનો ઉદ્દેશ એ જ છે કે ધીરજ રાખવાની છે કામ કઠિન છે પણ સમય ઘણો છે તો એક હથોડીભરી નજર અને સમજણની ટાંકણી લઈને બેસી જાઉં જાતને ખોતરવા માટે તમને તમારી IKIGAI મળી જશે.

ઘણા ઘરોમાં પૈસા આવવાના બંધ થયા છે અને આપણું બહાર જવાનું સાઉં બંધ છે આમાં માનસિક અસ્થિરતા આવશે પણ થોડું પોતાને રોકી લેજો આપણે કોરોનાને રોકવાનો છે..પોતાની જાતને વ્યસ્ત અને તંદુરસ્ત રાખવામાં મસ્ત રહો અને સુરક્ષિત રહો..જરૂર હોય ત્યાં કાઉન્સેલર હાજર છે અને જો આપને વાંચન ગમતું હોય તો આ પુસ્તક જરૂરથી વાંચો ✨

– હિરલ એમ જગડ ‘ હીર ‘🌈

આજે પહેલી એપ્રિલ ૨૦૨૦ છે એકવીસમી સદીને વીસમુ બેઠું એને ત્રણ મહિના પૂરા થઈ ગયા અને અત્યારે બહુ ગંભીર પરસ્થિતિમાં છે આ આખું જગત..એ આપણે સૌ જાણીએ જ છીએ થોડું જુદું કરીએ..કંઇક જાણીએ..!

કિવદંતી અનુસાર એપ્રિલફૂલની શરૂઆત ઈટાલીથી થયેલી. કહે છે કે ઈટાલીમાં આ દિવસની શરૂઆત એક કાર્નિવલથી થયેલી. કાર્નિવલના આ દિવસે લોકો ખૂબ શરાબ પીતા અને નશામાં ટલ્લી થઈ ખૂબ હસતા હતાં. આ દિવસે રાત્રીના સમયે લોકો ગેટ ટુ ગેધર કરતાં અને નાચી–કૂદી એન્જોય કરતાં. ઘણા લોકોની માન્યતા છે કે આ દિવસ યૂનાની સભ્યતાની દેન છે. આ સંબંધમાં એક લોકકથા છે કે એક માણસ પોતાને તીસમારખા સમજતો હતો તે માનતો હતો કે સર્વ કાર્યો કરવા તે જ કુશળ છે. તેથી તે અતિ અહંકારી બની ગયો હતો. તેના આ અહંકારને ઉતારવા માટે તેના મિત્રોએ એક દિવસ કહ્યું કે આજે સવારે ગામ બહાર રહેલ પહાડની ચોટી ઉપર એક સંત આવવાના છે તેઓ સર્વે ભક્તજનને પારસમણિ આપવાના છે જેથી કરીને સર્વે ભક્તો ઘણું બધુ ધન મેળવી શકે. તે માણસ પોતાના મિત્રોની વાત સાંભળી વિચારવા લાગ્યો કે હું સવારે તે પર્વત પર જવાને બદલે રાત્રીના સમયે જ જઈને બેસી જાઉં જેથી કરીને સૌથી પહેલા સંત મને જુએ ને સૌથી પહેલો પારસમણિ મને મળી જાય. આમ વિચારી તે માણસ રાત્રીના સમયે પહાડની ચોટી પર જઇ બેસી ગયો અને સવારની પ્રતિક્ષા કરવા લાગ્યો. બીજે દિવસે સવાર થઈ પણ તે સંત ન આવ્યા આથી તે વિચારવા લાગ્યો કે કદાચ સંતને મોડુ થઈ ગયું છે તેથી તે ત્યાં બેસી રહ્યો સવારની બપોર થઈ સાંજ થઈ રાત પડી પણ સંત ન આવ્યા બીજે દિવસની પણ સવાર પડી પણ સંત ન આવ્યા તેથી તે ચોટી પરથી ઉતરી પોતાને ઘેર આવ્યો અને મિત્રોને કહ્યું કે શા માટે તમે બધાએ મને તે પહાડની ચોટી પર દોડાવ્યો? ત્યારે તેના મિત્રો તેની મજાક કરી હસવા લાગ્યાં. આ દિવસથી યૂનાનમાં કહેવત પડી કે “પારસમણિ લેવા કાંઇ પર્વત પર ન જવાય એ તમારા નસીબમાં હોય તો ઘેર બેઠા પણ તમને મળી જાય.” અને આજ દિવસથી મૂર્ખ દિવસ ઉજવવાની પણ પ્રથા પડી.

૧૫૦૮ માં એક ફ્રાન્સીસી કવિએ એપ્રિલ ફૂલનો અર્થ એપ્રિલ ફિશ તરીકે ઓળખેલો હતો, ૧૫૩૯ માં અન્ય એક કવિ એ પણ એપ્રિલફૂલ ડે વિષે લખેલું હતું. ૧૬૮૬ માં બ્રિટનમાં મૂર્ખોનો પવિત્ર દિન ફિસ્ટ ડે તરીકે ઉજવવામાં આવ્યો હતો.૧૬૯૮ માં બ્રિટનના “ટાવર ઓફ લંડન” માં ઘણા લોકોને કાર્ડ મોકલવામાં આવ્યાં હતા જેમાં ટાવર ઓફ લંડનનાં સિંહોને ધોવાની સેરેમની જોવા માટે આમંત્રણ અપાયું હતું. આ આમંત્રણ કાર્ડ વાળા લોકો જ્યારે ત્યાં ગયા ત્યારે તેમને જાણ થઈ કે તેમની સાથે પ્રેન્ક થયો હતો. આ સદીઓ પછી એટ્લે કે ૧૮ અને ૧૯ મી સદી સુધી એપ્રિલફૂલની આ પરંપરાને આગળ વધારવામાં થોડે ઘણે અંશે ન્યૂઝપેપરો અને રેડિયો એ પણ ભૂમિકા ભજવી હતી.

આજે આપણે આપણા રોજની માથાકૂટ કે સમસ્યાથી છલોછલ ભરેલી જિંદગીમાં જે પળ બે પળ મજાક કરીએ છીએ તે એપ્રિલ ફૂલ છે અહીં શરૂઆત ભલે કોઈને મૂર્ખ બનવાની કથાથી થઈ હોય પણ પ્રયાસ સારો છે બીજાના જીવનમાં હાસ્યનો ઉમેરો કરવાનો પણ આપણે આપણી આદત મુજબ ફળાહારને ફરાળ કર્યું અને મજાકને ભડાસ કરી નાખ્યું છે..ઘણી વાર આપણે ન કાઢી શકતા હોય તેવી ઈષાઓને આવા કોઈ દિવસના નામે કરીને કાઢી નાખીએ છીએ કશુંક બહાર નીકળે ત્યાં સુધી વાંધો નથી પણ અંદર દબાવી રાખવું મુંઝારો કરે છે..ખરેખર નથી લાગતું કે બે મહિના બાદ એક દિવસ રાખવો જોઈએ ખુલ્લીને મજાક કરવાનો ? હૈયાની અંદરના કેટલા વિષાણુને તમારા શબ્દની ઉષ્મા જોવે એ બહાર આવે પછી ધીરે ધીરે શમી જાય..!

એકવીસ દિવસના લોકડાઉન દરમિયાન ઘણા ઘરોમાં ઝઘડા થતા હશે કોઈ આર્થિક કારણોથી તો ક્યાંક બાળકોને કારણે ક્યાંક વધુ પડતાં લાડથી તો ક્યાંક વધુ પડતી આળસથી ક્યાંક વધુ સ્નેહથી તો ક્યાંક સતત ચાલતી અવગણનાથી એની વચ્ચે એપ્રિલ ફૂલ આવ્યું છે મનની વાતને હાસ્યમાં મૂકીને ખુલ્લી જાઉં થોડું ખીલી જાઉં અને એકમેકને તક આપો મજાક કરવાની અને પોતાની જાતને તક આપો મજાક બનવાની પણ જો ધીરે ધીરે નીકળી જશે તો આ વિષ બનતું અટકી જશે માત્ર એપ્રિલ ફૂલના વિશ સુધી સીમિત રહેશે..!

જીવનની વૈશાખમાં તમને સૌને એપ્રિલ મુબારક..❤️

– હિરલ એમ જગડ ‘ હીર ‘ 🖤

લોકડાઉન થઈ ગયું છે આપણું જીવન અને જીવન વ્યવહાર પણ કદાચ એ જ ઇચ્છનીય પગલું છે.. ઘણાં બધા ઘણી બધી નીતનવી વાતો કરે છે..આમ થશે તેમ થશે..કોઈ એક દિવસ પૃથ્વીનો વિનાશ થઈ જશે..વગેરે વગેરે વગેરે.. આપણે ક્યારેય એમ કેમ નથી વિચારતા કે જો મૃત્યુની તારીખ ખબર પડી જાય તો કેવું સારું ! જેમ આપણે કોઈ નવા જીવના આગમનને ગોદભરાઈથી ઉજવીએ છીએ એમ કદાચ મૃત્યુનો પણ કોઈ પ્રસંગ આવત..દુઃખ જરૂર થાત પણ આપણે આપણી ઘણી બધી ઈચ્છાઓને મરતા પહેલા જીવી લેત..ઘણી બધી મૂર્છા અવસ્થામાં જીવતી લાગણીને તરોતાજા કરી લેત.. અજાણતાં થયેલી ભૂલો અને જાણી જોઈને તોડેલા સંબધોને ફરી સુધારી લેત..હવે હું જવાનો/જવાની છું એ વાતનો અફસોસ ઓછો અને અવસર અનેરો લાગત… આ વાત થઈ એ વિષય પર કે જો કહેવાતી વાતો પરથી પૃથ્વી નાશ પામે તો શું થાય..હાલની પરિસ્થિતિમાં..!

• 

હવે વાત કરીએ કોરોના વાઇરસ પર આ વાઈરસની વિગતો બહુ જ બધી જગ્યા પર ઉપલબ્ધ છે આંકડાઓ સાથે.. આપણે એની વાત નથી કરવી આપણે આપણી અંગત વાત કરવી છે..વાઇરસ શરીરમાં ન આવે એટલે આપણે ઘરમાં રહેવાનુ છે..માન્યું કે આપણને ઘરે બહુ લાંબો સમય નહિ ગમે પણ જો કંઈક કામ શોધી લેશો તો મળી જ જશે ઘરે રહેવાનું બહાનું…આજકાલ સોશીયલ મીડિયા પર નવી નવી નેવુંના દાયકાની રમતો જોવા મળે છે લોકો પરિવાર સાથે માસ્ક પહેરીને ફોટા મૂકે છે લોકો એકબીજાને મદદ કરવા આગળ વધ્યા છે સરકારને બને એટલો સહકાર કરે છે..પશુ પક્ષીઓનો અને ગરીબ વર્ગનો વિચાર કરે છે..નવી નવી ડિજિટલ રમતો અને ટાસ્ક શોધે છે નવું વિચારે છે…ક્યાંક સાંભળ્યું હતું કે જે થાય તે સારા માટે કંઇક ખરાબ થાય તો તેમાં પણ સારું છુપાયેલું છે..

• 

આ સારું તો છે કે આપણે જાણ્યું કે આપણા દેશમાં કેટલી એકતા છે ભલે એ બીમારીને ન થાય તેની બીકથી હોય કે કોઈ વ્યક્તિના શબ્દોથી..

અા સારું તો છે કે આપણે બહાર નથી જઈ શકતા એટલે આપણે આપણી અંદર જઈ શકીશું આપણી જાત સાથે એક ગોષ્ઠિ કરી શકીશું.

આ સારું જ છે કે દરરોજ સવાર થી સાંજ સુધી કામ પર સવાર થતો માણસ પોતાના પરિવાર સાથે રહી શકે છે એનું પરિવાર કેમ જીવે છે તે અભિવ્યક્તિને માણી શકે છે..( ખાસ કરીને મહાનગરીઓમાં)

આ સારું જ છે કે આપણે એક રોગને ભગાડવા એકબીજા સાથે અધડાવાનું બંધ કર્યું છે..આ પેલા જેવું છે “આપસ મેં હમ તુમ ભલે દુશ્મન હો પર હમદોનો કા દુશ્મન જો હો વો કટ્ટર દુશ્મન હૈ હમારા”

આ સારું જ છે કે આખો દિવસ ઘરે રહ્યા પછી એક ગૃહિણીની અને એના કામની કદર થાય છે.. ઘણાં ઘરોમાં કોઈ પુરુષે પહેલી વાર બટેકાની વેફર બનાવી હશે.😆

આ સારું જ તો છે કે તમને તમારા બાળક સાથે ફરી બાળપણ ઉજવવાનો એક ચાન્સ મળ્યો છે..તમે માત્ર એટીએમ નથી તમે એના વિચારોનું એન્ટેના છો તે સાબિત કરવા મળ્યું.

આ સારું તો છે કે તમને થોડો આરામ કરવાનો સમય મળ્યો છે..વર્ષોથી કટકી કરેલી ઊંઘનો હિસાબ મેળવી શકાશે..

આ સારું તો છે કે તમને તમારી સાથે મિટિંગ કરવાનો મોકકો મળ્યો છે નહિતર હંમેશા ઉપરછલું સેટિંગ કરીને તમારી જાતને દબાવી દો છો અને એના ખરા વ્યક્તિત્વને હળવાશથી ઉડાડી દો છો..

આ સારું જ તો છે કે તમે તમારા ગમતાં પુસ્તકની સુગંધમાં અને એના લખાણમાં તરબતર થઈ શકો છો..

આ સારું તો છે કે વર્ષોથી ફેવરિટ લીસ્ટ બનાવેલ ગીતો વાળા પેલા પ્લેલિસ્ટને નિરાંતે સાંભળી શકો છો.. કેટલાક જૂના પિકચરોને ફરી જોઈ શકો છો..

આલ્બમ ખોલીને ભૂતકાળ હાથમાં નિહાળી શકો છો એકમેકની વધુ નજીક આવી શકો છો..

આ બધું કદાચ વધુ પડતું લાગે અથવા એવું લાગે કે બહાર મહામારી છે અને આણે આ શું માંડ્યું છે..! સરકારનો અને બીજા ઘણા બધા સેવકો રક્ષકોનો આજ પ્રશ્ન છે કે દેશની કેટલીક જનતા એ આ શું માંડ્યું છે..? વારંવાર સૂચના મળવા છતાં આપણે શું કામ બહાર ફરીએ છીએ ? આપણે કોઈને કંઈ જ મદદ ન કરી શકીએ પણ કમસેકમ એક વસ્તુ તો કરી શકીએ કે શાંતિથી ઘરે જીવી શકીએ પોલીસનો કાફલો માત્ર તમને રોકવા માટે નથી એની પાસે કામ છે એને પણ પરિવાર છે તેમ છતાં એ કામ કરે છે તો એની સાથે થોડી અનુકળતા અને સમાયોજનભર્યું વર્તન કરીએ..મેડિકલ ઓફિસર..નર્સ..વૈજ્ઞાનિક.. મનોવૈજ્ઞાનિક તમામ આરોગ્ય વિભાગ જે સેવા માટે રાતદિવસ ઉપલબ્ધ છે તેને આપણા યોગ્ય નિયમોના પાલનથી એક સલામ આપીએ.. આપણે ખરેખર સામાજીક પ્રાણી છીએ એ સાબિત કરીએ..ઘરે રહીને મદદ આપીએ અને એકબીજાથી દૂર રહી સાથે ચાલીએ કોરોના જતો રહેશે પણ આ સમય દરમિયાન વીતેલી યાદો ખૂબ સુંદર લાગશે..અને આપણા યોગ્ય વર્તનનો દાખલો આપણી નવી પેઢીને આપી શકીશું..!

ઇટલીમાં ધડાધડ મૃત્યુ પામતા લોકો..હમણાં જ સમાચાર મળ્યા કે ચાર વર્ષે એકવાર રમાતી ઓલમ્પિક પાછળ ધેક્લાઈ.. કેટલાય લોકોએ પોતાના બધા પ્લાન બદલ્યા કે જેઓ બહુ મોટી પદવી પર છીએ..અને માફ કરશો આપણે કોઈ એટલે કોઈ એવું તો નથી જ કે જેના વગર દુનિયા અટકી પડે..હા પણ જો સાવચેતી નહિ રાખીએ તો આપણા કારણે દુનિયાને જરૂર તકલીફ આપીશું એ વાત સાચી છે..કેટલા બધા સેલિબ્રિટી એ પોતાના ઘરે કામ કરતા કર્મચારીને ઘરે રહેવા વિનંતી કરી..પોતે કામનું આયોજન કરે છે..આ બધું લખવાનો એક માત્ર ઈરાદો છે કે ગંભીર બનો..નહિ તો કોરોના આપણને હતાં નહોતા કરી નાખશે.. આપણે ૧૩૦ કરોડ લોકો છીએ આને સાચવવા દેશમાં સલામત રાખવા માટે જે સૂચન મળે છે તેને પાળીએ..!

બ્લોગ લખતાં પહેલા મેં લોકોના વિચારો પૂછ્યા હતા તેમાંથી એક નર્સિંગની વિદ્યાર્થિની એ કહ્યું કે મને અફસોસ થાય છે કે અમારી અત્યારે ખાસ જરૂર છે ત્યારે અમે હોસ્પિટલમાં સેવા નથી આપી શકતાં કેમકે હજુ અમે વિદ્યાર્થી છીએ એટલે..પણ એ એમની ધગશ સાથે નજીકના ભવિષ્યમાં સારી સેવા આપશે જરૂર આપશે..બાકી બધા લોકોના વિચારો મેં ઉપરની વાતમાં વણી લીધા છે..

હજુ કંઇક કહેવું હોઈ તો કમેન્ટ કરો…શાંતિથી ઘરે રહો..ઘર એ ધરતીનો છેડો છે આપણે કોરોના સાથે જો છેડો ફાડવો હોય તો ઘરે રહો..જીવવું હોય તો ઘરે રહો..બસ અત્યારે માત્ર ઘરે રહો…!

अब नहीं कोई बात खतरे की
अब सभी को सभी से खतरा है -जौन एलिया

#corona #stayhome #staysafe✨

– હિરલ એમ જગડ ” હીર “

તુમ મેરે લિયે કોઈ ઇલજામ મત ઢૂંઢો
ચાહા થા તુમ્હે, યહી ઇલજામ બહુત હૈ
-સાહિર લુધિયાનવી

ઘણી વખત નહિ આમ તો મોટે ભાગે આપણે એવું માનતા હોઈએ છીએ કે આપણે કોઈની અપેક્ષા રાખીએ છીએ એ જ સૌથી મોટી ભૂલ છે જો અપેક્ષા જ ન હોય તો દુઃખ આવશે જ નહિ પણ ખરેખર એવું બને ખરું ?

મૃદુલા અને મોહનની આ વાત બંન્ને પતિ પત્ની બન્યા તે પેહલા ચાર વર્ષથી પ્રેમી હતા બધું બરાબર ચાલતું હતું અને પછી ધીરે ધીરે એમ કહી શકાય કે ચલાવવામાં આવતું હતું. બંનેના લગ્નજીવન ના શરૂવાતના તબક્કામાં બધું ઠીક ચાલતું હતું..પણ કોઈ સમય એવો આવ્યો કે જ્યાં બંને એકમેકથી રિસાયેલા હતાં અને આમાં સંબંધ મચકોડાય જાય..બંને છૂટા પડ્યા અને બે વર્ષ પછી ફરી મળ્યાં અચાનક ત્યારે દબાયેલી લાગણી અને મજકોડાય ગયેલા સંબંધ પર હળદર લગાવવાનો એક મોક્કો મળ્યો બંને એ એકમેકના મનની વાત ખોલીને મૂકી ત્યારે સમજાયું કે આપણે વધુ અંગત થવામાં એકમેકની સંગત ખોઈ બેઠા..વાતમાં અર્થની બદલે આરોપ શોધવા લાગ્યા હતા અને વધુ જાણવામાં જાની દુશ્મન બની ગયા હતા.

આપણે ઘણા દંપતીમાં આ વસ્તુ જોઈ છે કે જેનો ચેહરો જોઇને સવાર પડતી હોય એ ચેહરાને આપણે નજીક કે દૂર દૂર સુધીના ભવિષ્યમાં જોવાની અનિચ્છા દર્શાવીએ છીએ..આવું કેમ થતું હશે ? એનું કારણ છે કે એકદમ નજીક કેમેરાને લઈ જવાથી ફોકસ હટી જાય છે..ધૂંધળું અને અસ્પષ્ટ દેખાય છે..આ અસ્પષ્ટતા માનસિક અંતર વધારે છે અને પછી સંબધોમાં દીવાસળી ચપાય છે..મૃદુલા અને મોહન સાથે પણ આવું જ થયું પણ સમયે એમને સમય આપ્યો અને એ સમયે એવી સમજણ પણ આપી કે બંને એકબીજાને સમજી શકે..બધાને આ તક મળતી નથી.

દરેક વ્યક્તિ (પ્રાણી) કશુંક ઝંખે છે તમારી પાસેથી મોટેભાગે તે સકારાત્મક લાગણી હોય છે આ લાગણીમાં વધઘટ એ પ્રેમને નિષેધક સહસંબંધમાં ફેરવી શકે છે..! આ વધઘટના હિસાબો કરવા કોઈ માર્ચ મહિનો ફિક્સ ના હોય જે થઈ શકે તે સમયે કરી નાખવું નહીં તો હાલત ખરાબ થઇ શકે આપણી અને આવી લાગણીઓની પણ..

શેરબજાર જેવું જ છે આ, અહીં ક્યારે શું ગબડી પડે કંઇ નક્કી નથી.. સંભાળીને ચાલજો..એટલું જોઈ લેવું કે કોરોના જેટલો હાનિકારક છે તેટલું આપણું વર્તન તો કોઈને હાની નથી પહોચાડતુને ?

©હિરલ એમ. જગડ ‘ હીર’ ❣️

જીવનની ખાટી મીઠી વાતો દર્શાવતું અને વાસ્તવિકતાને વધુ વ્યવસ્થિત રીતે દર્શાવતું એક ગુજરાતી ચલચિત્ર..જે વિરલ શાહ અને અમાત્યા ગોરડિયા ની કલમે લખાઈને સોલ સુત્રા પ્રોડકશનની મદદથી 28 ફેબ્રુઆરી 2020 ના રોજ રીલિઝ થયું છે…જે વરુણ નારવેકર દ્વારા લખાયેલ મુરબ્બા મરાઠી ચલચિત્ર નું રીમિક વર્ઝન છે.

આ આજે આ ચલચિત્ર – ફિલ્મ કે મુવિની ચર્ચા આપણા માનસ અને માનવ વર્તન ને સમજવાના સંદર્ભમાં કરીએ તો..

એક પુરુષ અને સતત જીતતો અથવા તો એમ કહીએ કે કોઈને કોઈ ઉપલબ્ધિ હાંસલ કરતો હોય એ જ્યારે વાસ્તવ જીવનમાં મુકાય ત્યારે એક ડર સાથે તે પગલાં પાડે છે.. અને આ ડર ની સાથે હંમેશા સંતાકૂકડી રમે છે અથવા તો એ એમ સમજે છે કે હું જ્યાં સુધી કોઈને કહીશ નહિ ત્યાં સુધી કોઈને ખબર નહિ પડે કે મને ડર લાગે છે..

હારી જવાનો ડર.. બીજા સામે ઉઘાડા પડી જવાનો ડર..
અસફળતાનો ભોગ બનવાનો ડર..
રીજેકશનનો ડર..
પ્રેફેક્ટ ન બની શકવાનો ડર..
બીજા ત્રીજા નંબર પર પછડાવનો ડર..

આ બધાં ડરથી એ એમ ભાગવાનો પ્રયાસ કરે છે જેમ કોઈ માણસ પોતાના પડછાયાને સંતાડવા મથતો હોય..!

પણ એ શક્ય તો નથી આ ડર તો ઘર કરી જ ગયો હોય છે પણ એની સાથે સાથે એક અહમ્ પણ ઉભો થાય છે અને સંબધો ને ઉઘય બનીને કોરી ખાય છે..

બે વર્ષનું રીલેશનશીપ..માતા પિતા સાથેની વાતચીત આ બધી જ જગ્યા પર ગેરસમજ ઊભી થાય છે..

પોતાના ડરને ઢાંકવા તે ઘણાં બધા લોકોની ભૂલોનો ધપ્પા કરે છે અને અંતે ધાપ્પા હેઠે એક પછી એક સંબધ દટાય છે..

ભૂલ સમયસર સમજાય તો સમાધાન થઈ શકે નહિ તો શોક જ મનાવો પડે..

આજની પેઢીને નવી સમજને જૂની પેઢીએ જેટલી સરળતાથી સ્વીકારી છે તેવી સરળતા કદાચ આ પેઢીમાં નથી આ વસ્તુને પણ નાની નાની વાતોમાં ફિલ્મમાં વણી લેવામાં આવી.

આ ઉપરાંત એક આર્થિક સામાજિક પરિસ્થતિ વચ્ચે એક મધ્યમ વર્ગીય પુરુષને પણ બતાવ્યો..એક ગૃહિણી અને એક માં કેવી હોય તેનું પણ અંકન કર્યું.

સંબધોમાં આટલી નિકટતા હોવા છતાં પણ આપણે આપણી આત્માને નિર્વસ્ત્ર કરીને બીજાની સામે મૂકી નથી શકતા અને એકલા એકલા લડત આદરી દઈએ છીએ.

સાથે સાથે આજની પેઢી પોતાના પાત્ર પ્રત્યે તેના કરિયર કેટલી સહાયક હોય છે તે પણ દર્શાવ્યું છે..!

પુરુષના અહમના કારણે ઘણી બધી વખત આખેઆખો સંબંધ ખરાબ થઈ જતો હોય અને જેનો ભોગ ઘણાં બધા લોકોને બનવું પડતું હોય છે..આ વાત પણ સુંદર રીતે આલેખી છે..!

કેટલાંક સ્પર્શી ગયેલા ડાયલોગ

મારા Male-ego મારી લઈ નાખી છે…!

આજે તારી સામે નાગો થવા આવ્યો છું..!

ગુસ્સામાં આપણે ખાલી સાંભળી (Hear) પણ સાંભળતા (listen) નથી..!

સંબંધો અને ગાડી બંન્ને બગડે એને રિપેર કરતાં રહેવાનું…!

~હિરલ એમ. જગડ ‘ હીર ‘

પપ્પા તમને ખબર છે નાનીના ઘરે જતી બસમાં જાદુ થાય છે બહુ ઉમળકા સાથે ભઈલું બોલ્યો.

પપ્પા હસતાં હસતાં કહે અચ્છા શું જાદુ થાય છે ? બસના ટાયર ગોળ ફરે અને બસ ચાલવા લાગે એ ? કે બીજું કંઈ ?

અરે ના ના પપ્પા મમ્મી બદલાય જાય છે..! પપ્પાને સમજાવતા ભઈલું બોલ્યો.

અને પપ્પા બધું સમજી ગયા હોય તેમ સ્તબ્ધ થઈ ગહન વિચારમાં ચાલ્યા ગયા.

આ એક નાની એવું નિરીક્ષણ પણ આ કરવા જેવું ખરી કદાચ દરેક રિક્ષા, બસ,ટ્રેન , પ્લેન કે કોઈ પણ વાહન જેમાં બેસીને સ્ત્રી પિયર તરફ જતી હશે એમાં જાદુ થતું હશે.

એક એવું જાદુ કે જ્યાં જવાબદારીઓ,કડાકૂટ, માથાકૂટ,સમયના બંધનની અદલાબદલી થઈ જતી હશે.

એને સવાર વહેલાં ઉઠીને દૂધવાળા પાસેથી દૂધ લેવાનો ખટકો નહિ હોય કે સસરા ને સમયસર ચા સાથે છાપું આપવાની ઉતાવળ નહિ હોય..સંતાનને શાળાએ પોહચાડવાની હાડમારી નહિ હોય કે સાસુ માટે સુગર ફ્રી વાનગીઓ બનાવવા માં અને પતિનું ટિફિન તૈયાર કરવાની દોડધામ નહિ હોય..

આ જાદુ જ તો છે તમે કોઈ સ્ત્રીની દિનચર્યાને નરીઆંખે કે સુક્ષ્મદર્શક યંત્ર મારફતે જોઈ હશે તો તમને જરૂર સમજાશે કે ખરેખર પિયર અને સાસરીમાં સ્ત્રી અલગ હોય છે.

આ સ્ત્રીનું દોગલું વર્તન નથી પણ આ એ વાતની પ્રતીતિ છે કે કોઈની દીકરી અને કોઈની પત્ની બનવાની ભૂમિકા તે બખુબી નિભાવે છે..!

એનાં જીવનમાં આવેલા બદલાવ સાથે એને એટલો લગાવ હોય છે કે એને બહુ વધુ સમય એના પિયરમાં રહેવું નથી ગમતું..તેના વિચારો અને વ્યવહાર પિયારપક્ષી ઓછા અને સાસરીપક્ષ તરફ વધુ ઝૂંકેલા હોય છે..!

કેટલીક એવી સ્ત્રીઓ હોય છે જે પિયર જવામાં પોતાના સામાન સાથે સાત આઠ દિવસ સુધીની થોડી ઝાઝી રસોઇ કે નાસ્તા પણ તૈયાર કરતી હોઈ કે એની ગેરહાજરીમાં બધાને કોઈ તકલીફ ન પડે..!

આજની નોકરી કરતી સ્ત્રી હોય કે ઘરને સજાવતી સ્ત્રી હોય તે જ્યારે પણ પિયર જાય છે જે પણ વાહનમાં જાય છે તેમાં જરૂર જાદુ થતું જ હશે એટલે જ આમ તે એક ઘરથી બીજા ઘર સુધી પોહચતાં જ જવાબદારી શૂન્ય અને બિન્દાસ થઈ જતી હશે..!

આપ પણ જો જો વેકેશન નજીક છે મુસાફરી કરવાની થાય તો આસપાસ નજર કરવાની કે..જાદુ તો નથી થતું ને તમારી બસમાં..😇

~હિરલ એમ. જગડ ‘ હીર ‘💭

તું તો બહુ છાનું રાખે છે..અમારાથી બધું..આપણી ઘણી બધી દીવાલો પર આપણે ચણતર કરીને પાણી છાંટી દીધું હોય છે એનાં પર ચૂનો લગાવો કે કલર કરવો આપણે યોગ્ય સમજતાં નથી..એટલે જેવા છે તેવાં જ સ્વરૂપમાં અપનાવીએ છીએ..વળી કેટલીક દીવાલો બહુ છુપી હોય છે જેને આપણે સંતાડી અને સાચવીને રાખી મૂકતા હોઈએ છીએ..જેના પર કોઈ કોઈ વ્યક્તિનો જ હાથ ફરતો હોય..
એ દીવાલ પર ઉઝરડાં અને પીડાની તિરાડો હોય છે..આના પર રૂઝ આપવાનું કામ એવી વ્યક્તિ કરે કે જેને પીડાને પ્રેમ કરતાં આવડતું હોય એને વેદના સાથે સંવેદના હોય..એને દર્દ સાથે દોસ્તી હોય તમારી સાથે આત્મીયતા હોય.. એ તમારામાં છૂપાયેલી એ હિડન દીવાલની તિરાડોને કડીયારું પૂરવા નીકળેલા કુંવારિકાની જેમ પૂરશે..અંદર પડેલા ઘા પર રાહત આપશે અને આથી જ તમને એની સામે આ હિડન દિવાલને ખોલવામાં ઝરા જેટલો પણ સંકોચ નહિ થાય..!

એક છોકરાની આ વાત આખા ફોનને પાસવર્ડ થી સિક્યોર રાખવાની તેને ટેવ હતી..તેના જીવનમાં તેની પ્રિયશી આવી તેણે આ જોયું તેને લાગ્યો કે એવું તો શું છુપાવવાનું હશે ? બંનેના સંબંધમાં સ્નેહ વધુ અને શંકા ઓછી હતી એટલે વાતચીતની અનુકૂળતા થઈ શકી..છોકરાએ કહ્યું કે મને આમ બધાની સામે ખુલ્લી જવું નથી ગમતું..બધા જે કંઈ મારા ફોનમાં જોવે છે તેનું કેવું અર્થઘટન એ બધું મારા હાથમાં નથી પણ મારા તરફથી તો હું કાળજી રાખી શકુને એટલે હું પાસવર્ડથી કેદ રાખું છું જેમ આપણા ઘરમાં આવતા પેહલા ડોરબેલ વગાડીને કોઈ આપણી પરવાનગી લે છે અને થોડી રાહ જોવે છે દરવાજે અને પછી પ્રવેશે છે તેમ મારી લાગણીઓ કે લાગણીઓથી કેદ છબીઓને કોઈને જોવી હોય તો એમને થોડી રાહ જોવી જ પડે અને મારી અનુમતિ સાથે એને પ્રવેશવું જોવે આવું મારું માનવું છે..તેની પિર્યશી કહે છે કે દરેક જગ્યા પર પાસવર્ડ ન રાખી શકાય પણ એવું જરૂર કરી શકાય કે કોઈ સંબંધ નું નિર્માણ જ એમ થાય કે તમારે આવું કંઈ કરવું ના પડે દરેકને એક ઉંબર ઓળગવો કે નહિ તેની મંજૂરી આપણે જ આપતાં હોઈએ છીએ કોઈ કશુંક જાણી જાય પછી આપણે સમજવાનો પ્રયાસ કરીએ વર્ડ્સ પાસ કરીએ અને કાં તો એવી બધી સંભવાનાઓ રચીએ છીએ કે કોઈ કશું જાણે નહિ..પણ આપણે ક્યાંક સંબંધની અંદર વિશ્વાસનો પાસવર્ડ નથી રાખી શકતા..આગળનું વિચારવામાં અત્યારનું નથી વિચારી શકતા.બધું સીક્યોર કરવામાં આપણે ક્યોર કરવાનું ભૂલી જતાં હોઈએ છીએ..અને હીડન કરવામાં આપણે હાઇડ કરીએ છીએ અને રાખીએ છીએ આપણી સંવેદના અને વેદના..!

તને પાસવર્ડ રાખવો કે ન રાખવો એ તારી મરજી પણ તને મારી સામે અને મારી સાથે અનુકૂળતા રહે તેની હું હંમેશા સંભાળ રાખીશ..કશુંક વાગ્યું હોય તો એને ઢાંકીને રખાય..એમ જ લાગણીના ઉઝરડાંને પણ ખુલ્લા ન મુકાય પણ એને કોઈની સામે સારવાર અર્થે તો ખોલવા જ રહ્યા..!

બીટ ઓફ ડે : ઘણું અંદર ધરબાયેલું છે..વાતો મોટી મોટી કરીને એમાં છુપાયેલું છે..બોલ્યા વગર ઘણું કહ્યું છે..જે કોઈક કોઈકને સંભાયેલું છે..!